Venerdì 4, Sabato 5 e Domenica 6 agosto 2017

Il primo giorno all’alpeggio

El prum dì sa mont

Canche se ruèa su te pra sa mont col fasc e la magnadiva, el prum lurger l’era de injignèr mìngol de legna. Te noscia Val, béleche a 2000 metri, la maor pèrt l’é zirmes, e el tobià se sà, l’era semper japede pra, donca la legna la era de zirm, e con cheles se fajea fora de bie zécui per invièr via el fech, e i ge dijea “zécol de lum”, i ardea che l’era n gust.

Dapò la tousa o la fémena più veia la tizèa e la metea sora a fèr polenta. Tel ciasel, se l’era mìngol gran, o cojinat se l’era pìcol, l’era un fregolèr fat con cater sasc mìngol squadré, dapò da n’ostola del tet sora fregolèr bandolèa jù la segosta che l’aea un rampin japede per tegnir sù el pael sora fech. La resteladora mujea la ciaura e se magnèa polenta, formai e lat. Sobito dò se batea la fauces, e el prum se seèa dedant el tobià.
Se l’era bon temp, sul domesdì via, se metea te tobià cheste lenzel de erba suta, che no se pel ge dir fen, perché no l’era amò sech, demò tant per poder dormir, per no cogner se butèr jù diretamenter via per el fon de tobià. In chela sera se cognea dormir sun chest fen e amgari dò mesanet se ruèa su la brees del fon, e te jelèa perché sa mont l’é semper aria cruva. Se vegnìa la pievia, in chela dì, no se podea meter da ite cartier, coscita se l’era un auter bacan sun chela mont che l’aea jà ite fen te tobià, se jìa da chal a ge domanèr che el te lasce dormir, magari che fossa stat mes’ora de strèda da lènc! Se nesciun aea ite fen te tobià, se cognea vegnir a cèsa a dormir. L’é stat de chel’outes, che vegnìa la pievia ogne dì, ence per una setemèna dò e dò, e coscita se cognea ogne dì su e ju.
Ma però, a ge pissèr l’era pa bel. Se ence che se scomenzèa a seèr da les cinch dadoman fin passà les ot da sera (ora veia), da un scura a l’auter, 14 o 15 ores. E amò valgugn contèa patofies fin mesanet. Indirao no se era mai stencé.

La fioritura dei botton d’oro in Val San Nicolò (Ph Ralf Brunel per APT Fassa)

Gé faghe el cont, che a te dèr duta chela sanità e chela forza, fossa stat la beleza de duc chi pré con fiores de ogne color e el bon udor de la rèja di zirmes apede l’udor che fajea duc chi bie fiores, spezialmenter dadoman, canche i é moi de rosèda, o dò na pioveta: edelbais, nègherles da mont, i zondrees di fiores da la sita, chela biences margarites, ciufagnes, sangons, àzoles, formedeles, àrniches, pan de Dio, fiores de èsin, anziènes, mègnes de la Madona, grifes de giat, fiores de loèrgia, fiores dal smauz, cuches, breghes, e dapò un muge de etres bie fiores che no me recorde più l’inom.
Ma se lurèa bolintiera da un scura a l’auter per se vadagnèr el pàbol per d’invern, spezialmenter se te aees na bela resteladora che vegnìa dò a trèr ciaura che te fajea un bel grignot, e magari la te sconea el codé intant che te batees la fauc, perché te ge coresses mìngol dò a la fèr stentèr. Ma el patron, parò, ge tegnìa de più a parèr dò, per aer prest n bel tobià pien de fen.

Simon de Giulio

Lascia un commento

Il tuo indirizzo email non sarà pubblicato. I campi obbligatori sono contrassegnati *

3 + 2 =